NKUMEHANGOHANGO KELEKELE

Lo ngelo kimotshi aki Mbapa kimotshi kakadjaseka la wadende ndo la anaawo asato wa wamato.

Ana wako asato wane waki amena wa heyama mvuta. Etsheelo ndo lokewo lawo

aka holoyeka lolemia ndo yema yookomiya otshale  ambutshi wawo.

Ona leenondo lokombo lande laki : "Mama Shingalete lodja topita abasa"

Ona la hende, wakawetaka : "Tshumbaasolo hato lolengo"

One la kose, mbkawasha lokombo la "Tshapanyeeloki" ne dia okalamushi akaleke efula.

Mbapa Kelekele aki olohe lo ngelo kekina.

Atokoma leko omalaka wa Shingalete paka lookongo wa shi hiende endaka lo lokendo leekolo.

Kelekele aki onto lakeyamka efula ndo laki la lokumu lo lokaho efula koko kene kele

ato tshe kombeyaka ele nde aki nto NKUMEHANGOHANGO

Aki lomena etondo wanto wa sena djekoleko akilo kana akose wawadiende tshe

wakandamaka lo tolonga tande.

Papa Kelekele aki losango la olangala waana wane ko nde mbosa lokendo dia ndjenana la shewo

dia nde cuka omoci. Paka lo mboka kako, laso aya suke la koma lo ngelo,

onga homanande la emuma womoto koolangala wa mete.

Washo oko epeno, dimena oko ngondo, ngamokeesase oko ahonga wemale taa...

- Mama cike, avoe olangala na ? Ocalende one atayacu ngane ?

- Mbapa lee, lambolemiya loledu laye. Dimi halakeye laso handenyi ohomba sawola laye akambo wetale etale.

- Ngoyi we mete cundju. Ko ndo lokombo laye mbahayalange mbitemi ?

- Okimoe mete, Mbapa lee. Ombisha lokombo ce lalangaye mbishami koko dimi ona mama

 halakoke mbisha onto lahameye lokombo lami woshasha.

- Ele ngaso mete na ? Lakamoto talenaka ona womoto la yimba efula oko we.

Handjokofutanya nto, omenya paka mboka ka dimi koma lene atamatshu kele kotshike ki.

- Ko we otshalende atayatshu na ?

- Tsha tohomana la Ona letawo "Shingalete" ne dia leko lo nanga towosa lo diwala.

- Ko toko Shingalete lodja topita abasa ndame one ateketa laye lane !

Mbapa Kelekele kusama lo kete ko tate mbida saka la ekoko waheyoma watekana onto lambodjo nyuma.

- Nyomi le, nyomi le, nkumootema kami ambombiteka ate eko paka we. Mama tshike lee, dimi kema la wadi.

One laki lami akashile la kaloya lomu lande le Wonyashongo.

Kene kokami wata lo lokombo laye mbambokonya polo leekolo waye elo kene.

Kakona kahombama dia sho ahende mbidjase na ?

- Dimi ndoko la dikambo ne dia lambokotsha enonyi wa tshukama. Tshoka toshidiya la ambusthi wami...

Mbapa Kelekele akenana la ambutshi ndo diwala diakasalema diaki diwala dia loka ne dia

edimba wase Yenge wakakomola kombe lo woho okina.

Kelekele la wadende wakasthu todjase lo ngelo kawo.

Shi yamboleka mbeta ko Mama Tshumbaasolo nde la she ate tokotsho tenda onalengo lo diwala.

Ko ambutshi wande mbowolonga la weshasha wa weho la weho otshale okilo wawo.

Nde akatodjase yediko ya ngondo nyei laka enondo wande Shingalete.

Loshi lookaloloelo lakakume.Shingalete akalonge eshiko wa weho la weho dia kendja kosende.

Otshumu omotshi aki paka lokema laakuta loko yewa.

Ko nde la kosende ate :

- onongame dimena. We ayone malane la koko ka tondo. Lo wonyooso omemi eke lo djo.

Kene keyami ndo kene kakawambite lane ele dia Mbapa Kelekele kenaye kengo, la ololo

wande wongo, eko Nkumehangohango.

Nde halombo okilo kana kosaawadi. nde mbowayelaka paka loshi lookaloelo

ko nde towodaka lateyi wa mboka ko nde mbela dia ndjole la ngelo.

Nde ambokitshaka tofudu la apomi wa ngomo lateyi wa mboka. We kokaka kembo

yaamena kana kombe yakosha posa ka kenya wenye, temalake, tetemala paka la lokendo laye.

We ambomboka dimena.

- Elo onalengo, leko lo koyela dimena. Losaka lo alako waye.

omalaso ko nde mboto lo mboka tshala kawo. Akoma lateyi wa mboka,

okinde ko matumba wa mamba ambotate komama.

Ngomo akamu woho waanyanya. Tofudu tate mbidja kembo ya mamba. Tone tatoma ko tokina teetawo;

Atumi :  Kelekele Kelekele

Ambetawi : Hee Kelekele

Atumi : Samanya kelekele

Ambetawi : Hee kelekele

Atumi : Samanya tole nyama

Ambetawi : Hee kelekele

Atumi : Hee okilaye Kelekele

Ambetawi : Hee Kelekele

Atumi : Mbatatshu Kelekele...

Koko Shingalete ya wadia Nkumehangohango aki lawo la tofudu tande takandatome lo dihole diako ne dia mbewolaka anto wande.

Kamakawoke ngaso ko vo tate vo lawo memba ndo vo :

- Kelekele kelekele

- Hee Kelekele

- Kalola Kelekele

- Hee Kelekele

- Ombetsha mboka Kelekele

- Hee Kelekele

- Leekutu ande weedima

- Hee Kelekele

Mbapa Kelekele lene akinde, ambemo malo djo ko ambotate mbosa mboka tshalo hiole yako yaki tofudu la edimba wene lo memba.

Mama "Tshumbaasolo hato lolengo la kosa Shingalete" mbosa nanda ko ndjiha atoyi wande diaha nde mongane kembo nye.

Laso ko nde tate samanya esadi esadi dia mimo omalo dihole diako ndo. Nkumehangohango ndjokoma lawo ngane ko ndoko onto.

Ko nde kalola atatome lolemi ate lambohandja nyama ka mete elo .

Okomelo waki Tshumbaasolo lakawo aki dikambo dia mamba ne dia akakume la diango dia weho la weho.

Kosende le Tshapanyeeloki akoke yema ya kandjema ndo akewoya ambutshi wande ate paka ndo dimi tsho laka endondo wami atowenda

kele nde katokendja oko woho wamondo tokendja Tshumabaaasolo.

Onoone akakume laka enondo wande. Vo mbowolongola dimena ndo mbidjase enonyi esato weetondo laka enondo wande.

Loshi la lokendo ko Kelekele ndame mboto lo kanda eshiko wakinde. Pesa yaahondo woho wanyanya, adjama, sabata, tambala dia weho la weho. 

Obombi wa nanula, eso keeshinde, akalo weenyumbe, ekowe wakendakenda, lokaakavu, oyengo, oyoko wa kidi, shima la mbaa...

Diango tshe wakawoshadio.

Onango mbeta lo sheke dia mbowewola lo kene kakoka mbokome lo mboka oko wakandewola Tshumbaasolo.

Lateyi wa deke, wonya waki mete Kelekele ohonga lokodu, ko Shingalete mone okoke okoke dia ndjemula kosende dia nde mbosa mboka.

- Ona mama, emoke wonya woso mbele dimena we tanyisha demba.

- Okonde wa memulaye lotsho wa ngaso dimi loka djo yami ? Kelekele ele onto la dimena ngane ko nyu mbomamiyeka akambo.

Ngande wayondole lane ? Otshike ndale djo, wonya wekeko efula.

- Konde na Tshapanyeeloki. we wambokosombolaka kana  esokoya mbambokemale ? Dimi dadi mbemi. One esadi oto lo mboka !

Tshapanyeeloki mbeto la okoke tshe. Mbosa eshiko wande tshe ko tate mbosa mboka ata ngunanguna ndo atadje akumu wa heyama ote leekolo.

Wonya wakandakome lo hioka yeedimba, ngomo tate mpela, kembo tate toka. Tofudu ngengu woho waanyanya.

Tshapanyeeloki ate talokaka woho wa kombe ya ngaso. Ko nde kitshe etshumu tshe lo kete.

Mbosa dotshi dimotshi ko nde shinganya ohele ko tate kundjola lokombe.

Tofudu taki onango kaweembe dia mbowewola ndo dia shimba oyelo wa Kelekele, tshanana !

Tshapanyeeloki eko paka lo  mingitola lokende watekana oseme wa dikiyo.

Wonya kayaka edja, Kelekele ambokoma.

Tshapanyeeloki akandenyi ane ko Kelekele tate kadimo Nkumehangohango lo washo wande,

ko mbowomame paka mbalootoyi ko  mbososomiya loonyo wande paka watekana djundje mbamena yoonona.

Shimu akomeka ko ko !

Onto la onto oke kene kalangande mboka maloko.